काठमाडौं – नेपाल राष्ट्र बैंकले थप २७ वटा होर्मोनिक कोडबाट आयात हुने वस्तुको प्रतितपत्र (एलसी) खोल्न कडाइ गरेको छ । राष्ट्र बैंक विदेशी विनिमय व्यवस्थापन विभागले बुधबार एक परिपत्र जारी गर्दै कुल ४७ वटा होर्मोनिक (एचएस) कोडबाट आयात हुने वस्तुको लागि एलसी खोल्दा ५० प्रतिशत र शत प्रतिशत नगद मार्जिनको व्यवस्था गरेको हो । राष्ट्र बैंकका प्रवक्ता डा. गुणाकर भट्टका अनुसार ड्राइ फुड, माछा, मासु, तयारी पोशाक तथा कपडालगायतका वस्तु आयात गर्न कडाइ गरेको हो । होर्मोनिक कोड ०३ बाट सुरु हुने माछा र माछाजन्य अन्य परिकारको आयात गर्दा एलसीमा शतप्रतिशत मार्जिनको व्यवस्था गरेको छ ।

राष्ट्र बैंकले यसअघि पुस ५ गते विभिन्न २० वटा हार्मोनिक कोडबाट आयात हुने वस्तुहरु आयात गर्न एलसी खोल्दा नगद मार्जिन राख्नुपर्ने व्यवस्था गरेको थियो ।  जसमध्ये विद्युतीय गाडी र मोटरसाइकलबाहेकका अन्य  गाडी र मोटरसाइकको आयातको लागि एलसी खोल्न ५० प्रतिशत नगद मार्जिन र त्यसबाहेकका अन्य १८ वटा हार्मोनिक कोडको लागि भने शतप्रतिशत नगद मार्जिनको व्यवस्था गरिएको थियो ।